ఐకాన్ స్టార్ అల్లు అర్జున్ ప్రస్తుతం పాన్ ఇండియా స్థాయిలో తనకంటూ ప్రత్యేకమైన గుర్తింపును సంపాదించుకొని దూసుకుపోతున్న విషయం తెలిసిందే. ముఖ్యంగా ‘పుష్ప’, ‘పుష్ప 2’ చిత్రాలతో దేశవ్యాప్తంగా భారీ క్రేజ్‌ను సొంతం చేసుకున్న ఆయన తదుపరి సినిమాలపై ప్రేక్షకుల్లో భారీ అంచనాలు నెలకొన్నాయి. ఈ క్రమంలో అల్లు అర్జున్‌కు సంబంధించిన ఓ ఆసక్తికరమైన వార్త ప్రస్తుతం సినీ వర్గాల్లో చర్చనీయాంశంగా మారింది. మాస్ చిత్రాల దర్శకుడు బోయపాటి శ్రీను దర్శకత్వంలో అల్లు అర్జున్ మరో సినిమా చేయబోతున్నట్లు వార్తలు వినిపిస్తున్నాయి. ఈ సినిమాను ప్రముఖ నిర్మాణ సంస్థ గీతా ఆర్ట్స్ నిర్మించనున్నట్లు ప్రచారం జరుగుతుండటంతో ఈ ప్రాజెక్ట్‌పై ఆసక్తి మరింత పెరిగింది.

అల్లు అర్జున్ కెరీర్‌ను పరిశీలిస్తే ప్రతి సినిమాతో తన నటనలోనూ, కథల ఎంపికలోనూ వైవిధ్యాన్ని చూపిస్తూ ముందుకు సాగుతున్నారు. ‘ఆర్య’, ‘దేశముదురు’, ‘రేసుగుర్రం’, ‘సన్నాఫ్ సత్యమూర్తి’, ‘అల వైకుంఠపురములో’ వంటి చిత్రాలతో కుటుంబ ప్రేక్షకులకు చేరువైన ఆయన, ‘సరైనోడు’, ‘డీజే’, ‘పుష్ప’ వంటి సినిమాలతో మాస్ ప్రేక్షకులను విశేషంగా ఆకట్టుకున్నారు. ముఖ్యంగా సుకుమార్ దర్శకత్వంలో వచ్చిన ‘పుష్ప’ రెండు భాగాలు ఆయనకు అంతర్జాతీయ స్థాయిలో గుర్తింపును తీసుకొచ్చాయి. నటుడిగా విభిన్నమైన పాత్రలు పోషించడంలో అల్లు అర్జున్ చూపిస్తున్న ఆసక్తి ఆయన సినిమాలపై అంచనాలను పెంచుతోంది.

బోయపాటి అంటే మాస్, మాస్ అంటే బోయపాటి

మరోవైపు బోయపాటి శ్రీను అంటేనే భారీ యాక్షన్ సన్నివేశాలు, పవర్‌ఫుల్ డైలాగులు, మాస్ ఎలివేషన్లకు పెట్టింది పేరు. ‘భద్ర’ సినిమాతో దర్శకుడిగా పరిచయమైన ఆయన ‘తులసి’, ‘సింహా’, ‘లెజెండ్’, ‘సరైనోడు’, ‘జయ జానకి నాయక’, ‘అఖండ’, ‘స్కంద’ వంటి చిత్రాలతో ప్రత్యేకమైన మాస్ దర్శకుడిగా గుర్తింపు తెచ్చుకున్నారు. ముఖ్యంగా బాలకృష్ణతో చేసిన ‘సింహా’, ‘లెజెండ్’, ‘అఖండ’ చిత్రాలు బాక్సాఫీస్ వద్ద మంచి విజయాలను అందుకున్నాయి. హీరోలలోని మాస్ ఇమేజ్‌ను తెరపై అత్యంత ప్రభావవంతంగా చూపించడంలో బోయపాటి ప్రత్యేకమైన శైలిని కలిగి ఉన్నారు.

ఇక అల్లు అర్జున్, బోయపాటి శ్రీను కాంబినేషన్ గురించి ప్రత్యేకంగా చెప్పుకోవాల్సిన అవసరం లేదు. వీరిద్దరి కలయికలో గతంలో వచ్చిన ‘సరైనోడు’ చిత్రం 2016లో విడుదలై బాక్సాఫీస్ వద్ద ఘనవిజయాన్ని అందుకుంది. గీతా ఆర్ట్స్ బ్యానర్‌పై అల్లు అరవింద్ నిర్మించిన ఈ సినిమాలో అల్లు అర్జున్ సరసన రకుల్ ప్రీత్ సింగ్, కేథరిన్ థ్రెసా హీరోయిన్లుగా నటించారు. శ్రీకాంత్ కీలక పాత్రలో కనిపించగా, ఆది పినిశెట్టి ప్రతినాయకుడిగా ఆకట్టుకున్నారు. తమన్ సంగీతం అందించారు. ముఖ్యంగా ఈ సినిమాలో అల్లు అర్జున్ చేసిన యాక్షన్ సన్నివేశాలు, పవర్‌ఫుల్ డైలాగులు అభిమానులను విశేషంగా ఆకట్టుకున్నాయి. బోయపాటి మాస్ టేకింగ్‌కు అల్లు అర్జున్ ఎనర్జీ తోడవడంతో ‘సరైనోడు’ ప్రేక్షకులకు మంచి మాస్ ఎంటర్‌టైనర్‌గా నిలిచింది.

మరోసారి బోయపాటి అల్లు అర్జున్ కాంబో రిపీట్

ఇప్పుడు మరోసారి ఇదే కాంబినేషన్‌లో సినిమా రాబోతుందనే ప్రచారం ఆసక్తిని కలిగిస్తోంది. ఈ ప్రాజెక్ట్‌ను గీతా ఆర్ట్స్ నిర్మించనున్నట్లు వార్తలు రావడం కూడా ప్రాధాన్యత సంతరించుకుంది. గతంలో ఇదే నిర్మాణ సంస్థలో వచ్చిన ‘సరైనోడు’ విజయాన్ని దృష్టిలో పెట్టుకుంటే కొత్త సినిమాపై అంచనాలు భారీగా ఉండటం సహజం. అయితే ఈ ప్రాజెక్ట్‌కు సంబంధించిన కథ, నటీనటులు, షూటింగ్ ప్రారంభం వంటి వివరాలు ఇంకా అధికారికంగా వెల్లడికావాల్సి ఉంది.

ఒకవేళ ఈ కాంబినేషన్ కార్యరూపం దాలిస్తే అల్లు అర్జున్ అభిమానులకు మరో భారీ మాస్ విందు ఖాయమనే చెప్పాలి. గతంలో ‘సరైనోడు’తో మ్యాజిక్ చేసిన ఈ ఇద్దరు మరోసారి ఎలాంటి విజయాన్ని అందుకుంటారో చూడాలి.

‘రాకా’తో అల్లు అర్జున్ ఫుల్ బిజీ

అల్లు అర్జున్ ప్రస్తుతం అట్లీ దర్శకత్వంలో తెరకెక్కుతున్న రాకా అనే చిత్రంలో హీరోగా నటిస్తున్నాడు. ఈ సినిమాపై పెద్ద స్థాయిలో అంచనాలు ఉన్నాయి. ఈ మూవీ తర్వాత ఈయన లోకేష్ కనగరాజ్ దర్శకత్వంలో ఓ సినిమా, సందీప్ రెడ్డి వంగ దర్శకత్వంలో మరో సినిమా చేయడానికి రెడీగా ఉన్నాడు. వీటితో పాటు మలయాళ ఇండస్ట్రీలో నటుడిగా, దర్శకుడుగా మంచి గుర్తింపును సంపాదించుకున్న బసిల్ జోసెఫ్ దర్శకత్వంలో కూడా ఓ సినిమా చేసే అవకాశాలు ఉన్నట్లు పెద్ద ఎత్తైన వార్తలు వస్తున్నాయి. మరి బోయపాటి శ్రీనుతో అల్లు అర్జున్ సినిమా చేస్తే ఈ మూవీల తర్వాత ఆ సినిమా ఉంటుందా? లేక రాకా పూర్తి కాగానే ఉంటుందా?అనేది ప్రస్తుతం ఇండస్ట్రీలో ఆసక్తికరంగా మారింది.