సూపర్‌స్టార్ రజనీకాంత్ ( Rajinikanth ) నటించిన ‘జైలర్ 2’ ( Jailer 2 ) సినిమా విడుదలకు ముందే టికెట్ ధరల అంశం చర్చనీయాంశంగా మారింది. ఆంధ్రప్రదేశ్‌లో ఈ చిత్రానికి టికెట్ ధరలు పెంచుకునేందుకు ప్రభుత్వం అనుమతి ఇవ్వడంతో ఈ వ్యవహారంపై భిన్నాభిప్రాయాలు వ్యక్తమవుతున్నాయి. అక్టోబర్ 15న ప్రేక్షకుల ముందుకు రానున్న ఈ సినిమాపై ఇప్పటికే భారీ అంచనాలు నెలకొన్నాయి. అయితే టికెట్ ధరల పెంపు నిర్ణయం సినిమా బాక్సాఫీస్ ప్రదర్శనపై ఎలాంటి ప్రభావం చూపుతుందనేది ఆసక్తికరంగా మారింది.

ఏపీలో టికెట్ ధరల పెంపుకు పర్మిషన్:

ఆంధ్రప్రదేశ్‌లో ‘జైలర్ 2’ విడుదలైన మొదటి ఏడు రోజుల పాటు టికెట్ ధరలను పెంచుకునేందుకు అనుమతి లభించింది. సింగిల్ స్క్రీన్ థియేటర్లలో ఒక్కో టికెట్‌పై రూ.50 వరకు, మల్టీప్లెక్స్‌లలో రూ.75 వరకు అదనంగా వసూలు చేసేందుకు అవకాశం కల్పించారు. ఈ ధరల్లో జీఎస్టీ కూడా కలిపి ఉంటుంది. అంతేకాకుండా మొదటి వారంలో రోజుకు ఐదు షోలు ప్రదర్శించేందుకు అనుమతి ఇచ్చారు. దీంతో సినిమా విడుదలైన మొదటి వారంలో ఎక్కువ మంది ప్రేక్షకులకు ప్రదర్శనలు అందుబాటులోకి వచ్చే అవకాశం ఉంది.

సామాన్యులపై అదనపు భారం:

అయితే పెరిగిన టికెట్ ధరలు సామాన్య ప్రేక్షకులపై అదనపు భారాన్ని మోపుతాయనే అభిప్రాయాలు కూడా వ్యక్తమవుతున్నాయి.
‘జైలర్ 2’ చిత్రానికి నెల్సన్ దిలీప్‌కుమార్ దర్శకత్వం వహిస్తున్నారు. గతంలో రజనీకాంత్‌తో ఆయన తెరకెక్కించిన ‘జైలర్’ సినిమా మంచి విజయాన్ని అందుకోవడంతో ఈ సీక్వెల్‌పై అంచనాలు పెరిగాయి. మాస్ ఎలిమెంట్స్, యాక్షన్ సన్నివేశాలు, రజనీకాంత్ స్టైల్‌ను దర్శకుడు ఎలా చూపించబోతున్నారనే ఆసక్తి అభిమానుల్లో నెలకొంది.

ఫస్ట్ పార్ట్ తో పెరిగిన అంచనాలు:

మొదటి భాగానికి లభించిన ఆదరణను దృష్టిలో పెట్టుకొని రెండో భాగాన్ని కూడా భారీ స్థాయిలో ప్రేక్షకుల ముందుకు తీసుకొస్తున్నారు. ఈ నేపథ్యంలో సినిమా కథ, స్క్రీన్‌ప్లే, రజనీకాంత్ పాత్ర చిత్రణ ప్రేక్షకులను ఏ మేరకు ఆకట్టుకుంటాయనేది కీలకంగా మారింది. ఈ చిత్రంలో రజనీకాంత్‌తో పాటు రమ్యకృష్ణ, ఎస్.జె. సూర్య, విద్యా బాలన్, మిథున్ చక్రవర్తి, సూరజ్ వెంజరమూడు తదితరులు నటిస్తున్నారు.

ప్రముఖులు ఉండటంతో మరింత పెరిగిన అంచనాలు:

మోహన్‌లాల్, శివరాజ్‌కుమార్ వంటి ప్రముఖ నటులు కూడా ఈ చిత్రంతో అనుబంధం కలిగి ఉండటంతో సినిమాపై ఆసక్తి మరింత పెరిగింది. ఇంతమంది ప్రముఖ నటీనటులు భాగం కావడం సినిమాకు ప్రత్యేక ఆకర్షణగా నిలుస్తోంది. అనిరుధ్ రవిచందర్ సంగీతం అందిస్తున్న ఈ చిత్రానికి సన్ పిక్చర్స్ నిర్మాణ బాధ్యతలు చేపట్టింది. యాక్షన్, డ్రామా, స్టార్ హీరోల కలయికతో రూపొందిన ఈ సినిమా ప్రేక్షకులకు ఎలాంటి అనుభూతిని అందిస్తుందో చూడాలి.

రిస్క్ చేస్తున్న చిత్ర యూనిట్

టికెట్ ధరల పెంపు ప్రభావం సినిమా కలెక్షన్స్ పై కూడా పడే అవకాశం ఉందనే అనుమానాలు మొదలవుతున్నాయి. సినిమా హిట్ అయితే ఎంత ధర అయినా పెట్టడానికి ప్రేక్షకులు సిద్ధం అవుతారు. కానీ సినిమా సరిగ్గా లేకపోతే కలెక్షన్స్ పై భారీ ప్రభావం పడుతుంది. ముందే సినిమాకు నెగిటివ్ టాక్ వస్తే ప్రేక్షకులు థియేటర్ కు వెళ్ళి చూసే సాహసం కూడా చేయరు. అదే యావరేజ్ గా ఉన్నా… హిట్ టాక్ వచ్చినా ఒకసారి వెళ్ళి చూడాలని అనుకుంటారు. ఇటీవల కాలంలో టాలీవుడ్ హీరోలు సైతం టికెట్ రేట్ల పెంపు విషయంలో చాలా జాగ్రత్తగా వ్యవహరిస్తున్నారు. ఒక్కప్పుడు టికెట్ రేట్ల పెంపు కోసం మంత్రుల చుట్టూ తిరిగిన హీరోలు ఇప్పుడు తమ సినిమాలకు టికెట్ ధరల్లో ఎలాంటి పెరుగుదల ఉండదు అని ముందే క్లారిటిస్తున్నారు. రీసెంట్ గానే విజయ్ దేవరకొండ సైతం అలాంటి ప్రకటన చేసి వార్తల్లో నిలిచారు. తన సినిమాలకు టికెట్ ధర పెంచడం అవసరం లేదని చెప్పారు. తాను రాజమౌళి తో సినిమా చేస్తే తప్ప టికెట్ ధరను పెంచాలని కోరను అని స్పష్టం చేశారు. దీంతో హీరోలు రిస్క్ చేయట్లేదని అర్థమవుతుంది.