మెగా పవర్ స్టార్ రామ్ చరణ్, క్రియేటివ్ డైరెక్టర్ సుకుమార్ కాంబినేషన్‌లో సినిమా వస్తుందంటే ప్రేక్షకుల్లో అంచనాలు ఏ స్థాయిలో ఉంటాయో ప్రత్యేకంగా చెప్పాల్సిన అవసరం లేదు. గతంలో వీరిద్దరి కలయికలో వచ్చిన ‘రంగస్థలం’ బాక్సాఫీస్ వద్ద అద్భుతమైన విజయాన్ని అందుకోవడంతో పాటు రామ్ చరణ్ కెరీర్‌లోనే ప్రత్యేకమైన చిత్రంగా నిలిచిపోయింది. ఇక ఇప్పుడు చాలా సంవత్సరాల తర్వాత ఈ క్రేజీ కాంబినేషన్ మరోసారి ప్రేక్షకుల ముందుకు వచ్చేందుకు సిద్ధమవుతోంది. ప్రస్తుతం RC17 అనే వర్కింగ్ టైటిల్‌తో ప్రచారంలో ఉన్న ఈ సినిమాకు సంబంధించి తాజాగా ఓ ఆసక్తికరమైన వార్త సోషల్ మీడియాలో వైరల్ అవుతోంది.
RC17కు అర్జున టైటిల్?
రామ్ చరణ్ హీరోగా సుకుమార్ దర్శకత్వంలో తెరకెక్కనున్న ఈ సినిమాకు ‘అర్జున’ (ARJUNA) అనే టైటిల్‌ను పరిశీలిస్తున్నట్లు ప్రచారం జరుగుతోంది. ఇటీవలే ఈ సినిమాకు సంబంధించిన పూజా కార్యక్రమాలు కూడా ఘనంగా పూర్తయ్యాయి. నవంబర్ 1న జరిగిన ఈ వేడుకలో మెగాస్టార్ చిరంజీవి పాల్గొని చిత్ర బృందానికి శుభాకాంక్షలు తెలియజేశారు. దీంతో సినిమాకు సంబంధించిన ప్రీ ప్రొడక్షన్ పనులు మరింత వేగవంతం కానున్నాయి.
ఇక ఈ నేపథ్యంలోనే అర్జున అనే టైటిల్ తెరపైకి రావడం అభిమానుల్లో ఆసక్తిని పెంచుతోంది. అర్జునుడు అంటే ధైర్యం, లక్ష్యం, పరాక్రమానికి ప్రతీక. అలాంటి పేరును రామ్ చరణ్ సినిమాకు పెడితే ఎలా ఉంటుందనే చర్చ అభిమానుల్లో మొదలైంది. అయితే ఈ టైటిల్ విషయంలో చిత్ర బృందం నుంచి ఇప్పటివరకు అధికారిక ప్రకటన రాలేదు.
హీరోయిన్ విషయంలో ఆసక్తికరమైన వార్తలు!
ఈ సినిమాలో రామ్ చరణ్ సరసన నటించబోయే హీరోయిన్ ఎవరనే విషయంపై కూడా గత కొన్ని రోజులుగా అనేక వార్తలు వినిపిస్తున్నాయి. ముఖ్యంగా బాలీవుడ్ నటి సారా అర్జున్ పేరు ప్రముఖంగా తెరపైకి వచ్చింది. ‘ధురంధర్’ సినిమాతో మంచి గుర్తింపు తెచ్చుకున్న ఈ బ్యూటీని RC17లో హీరోయిన్‌గా తీసుకునేందుకు చిత్ర బృందం ఆసక్తి చూపిస్తున్నట్లు గతంలో కథనాలు వచ్చాయి.
అంతేకాకుండా అనస్వర రాజన్, అనీత్ పడ్డా, సాత్విక వీరవల్లి వంటి పేర్లు కూడా హీరోయిన్ రేసులో వినిపించాయి. అయితే వీరిలో ఎవరిని ఎంపిక చేశారనే విషయంపై అధికారిక స్పష్టత రావాల్సి ఉంది. సుకుమార్ సినిమాల్లో కథానాయిక పాత్రలకు కూడా ప్రత్యేకమైన ప్రాధాన్యత ఉంటుంది. అందుకే ఈ సినిమాలో హీరోయిన్ ఎంపికపై అభిమానులు ఆసక్తిగా ఎదురుచూస్తున్నారు.
సంగీత దర్శకుడిగా అనిరుధ్?
సాధారణంగా సుకుమార్ సినిమా అంటే దేవిశ్రీ ప్రసాద్ సంగీతం ప్రత్యేక ఆకర్షణగా నిలుస్తుంది. వీరిద్దరి కాంబినేషన్‌లో వచ్చిన పాటలు, నేపథ్య సంగీతం ప్రేక్షకులను ఎంతగానో ఆకట్టుకున్నాయి. అయితే ఈసారి RC17 కోసం సుకుమార్ కొత్త సంగీత దర్శకుడితో పనిచేయనున్నట్లు వార్తలు వస్తున్నాయి. ముఖ్యంగా సెన్సేషనల్ మ్యూజిక్ డైరెక్టర్ అనిరుధ్ రవిచందర్ ఈ సినిమాకు సంగీతం అందించనున్నట్లు పెద్ద ఎత్తున వార్తలు వస్తున్నాయి. కానీ చిత్ర బృందం మాత్రం ఇప్పటివరకు అధికారికంగా దానిని వెల్లడించలేదు.
అనిరుధ్ తనదైన బ్యాక్‌గ్రౌండ్ స్కోర్‌తో సినిమాలకు ప్రత్యేకమైన గుర్తింపు తీసుకొస్తున్నారు. రామ్ చరణ్ మాస్ ఇమేజ్‌కు, సుకుమార్ స్క్రీన్ ప్లే డిజైన్ కి తగట్లు అనిరుధ్ సంగీతం తోడైతే థియేటర్లలో మరో స్థాయి అనుభూతి కలిగే అవకాశం ఉంది.
భారీ నిర్మాణంలో RC17
ఈ చిత్రాన్ని మైత్రీ మూవీ మేకర్స్, సుకుమార్ రైటింగ్స్ సంయుక్తంగా నిర్మిస్తున్నాయి. నవీన్ ఎర్నేని, వై. రవిశంకర్, సుకుమార్ నిర్మాణ బాధ్యతల్లో భాగస్వాములుగా ఉండగా, టీ-సిరీస్‌కు చెందిన భూషణ్ కుమార్ కూడా ఈ ప్రాజెక్టులో భాగస్వామిగా ఉన్నారు.
మొత్తానికి రంగస్థలం తర్వాత రామ్ చరణ్, సుకుమార్ కలిసి చేస్తున్న ఈ రెండో సినిమా కావడంతో అభిమానుల్లో భారీ అంచనాలు నెలకొన్నాయి. అర్జున అనే టైటిల్ నిజమవుతుందా? అనిరుధ్ ఈ చిత్రానికి నిజంగానే సంగీతం అందిస్తాడా? హీరోయిన్‌గా ఎవరు ఖరారు కానున్నారు? అనే విషయాలపై త్వరలోనే మరిన్ని స్పష్టతలు వచ్చే అవకాశం ఉంది.
మరికొన్ని రోజుల్లోనే షూటింగ్ స్టార్ట్
ఇక నిన్ననే పూజా కార్యక్రమాలు ప్రారంభం కావడంతో ఈ మూవీకి సంబంధించిన రెగ్యులర్ షూటింగ్ మరికొన్ని రోజుల్లోనే స్టార్ట్ చేయడానికి మూవీ బృందం సన్నాహాలు చేస్తున్నట్టు తెలుస్తుంది.
