విక్టరీ వెంకటేష్, మాటల మాంత్రికుడు త్రివిక్రమ్ శ్రీనివాస్ కాంబినేషన్‌లో సినిమా వస్తుందంటే ప్రేక్షకుల్లో అంచనాలు ఏ స్థాయిలో ఉంటాయో ప్రత్యేకంగా చెప్పాల్సిన అవసరం లేదు. గతంలో వీరిద్దరి కాంబినేషన్‌లో వచ్చిన సినిమాలు ప్రేక్షకులను ఎంతగానో ఆకట్టుకున్నాయి. ఈ నేపథ్యంలో హారికా అండ్ హాసిని క్రియేషన్స్ నిర్మాణంలో తెరకెక్కిన ‘ఆదర్శ కుటుంబం’ చిత్రంపై కూడా విడుదలకు ముందే భారీ అంచనాలు ఏర్పడ్డాయి. అయితే అక్టోబర్ 30న ప్రేక్షకుల ముందుకు వచ్చిన ఈ సినిమా బాక్సాఫీస్ వద్ద మాత్రం ఆశించిన స్థాయిలో ప్రభావం చూపలేకపోతోంది. ప్రస్తుతం ఈ చిత్రం భారీ నష్టాల దిశగా పయనిస్తుండటం టాలీవుడ్‌లో చర్చనీయాంశంగా మారింది.
రూ.130 కోట్లకు చేరిన సినిమా బడ్జెట్?
ఈ సినిమాకు సంబంధించిన నిర్మాణ వ్యయం మొదట అనుకున్న అంచనాలను దాటిపోయినట్లు ట్రేడ్ వర్గాల్లో ప్రచారం జరుగుతోంది. కథా చర్చలు, స్క్రిప్ట్ మార్పులు, షూటింగ్ ఆలస్యం వంటి కారణాలతో నిర్మాణ వ్యయం గణనీయంగా పెరిగిందని సమాచారం. కొన్ని ట్రేడ్ కథనాల ప్రకారం ఈ సినిమా బడ్జెట్ సుమారు రూ.128 కోట్లకు చేరినట్లు తెలుస్తోంది. దీంతో థియేట్రికల్ మార్కెట్‌లో పెట్టిన పెట్టుబడిని తిరిగి రాబట్టడం నిర్మాతలకు, డిస్ట్రిబ్యూటర్లకు పెద్ద సవాలుగా మారింది.
తొలి మూడు రోజులు ఓకే.. ఆ తర్వాత భారీ డ్రాప్!
విడుదలైన మొదటి మూడు రోజుల్లో ‘ఆదర్శ కుటుంబం’ బాక్సాఫీస్ వద్ద ఫర్వాలేదనిపించింది. అయితే సోమవారం నుంచి కలెక్షన్లలో ఒక్కసారిగా భారీ తగ్గుదల కనిపించింది. తొలి ఐదు రోజుల్లో ఈ సినిమా ఇండియా నెట్ వసూళ్లు రూ.37.40 కోట్లుగా నమోదయ్యాయి. ప్రపంచవ్యాప్తంగా రూ.58.95 కోట్ల గ్రాస్ వసూళ్లను సాధించినట్లు అంచనా. ముఖ్యంగా ఆదివారం వచ్చిన వసూళ్లతో పోలిస్తే సోమవారం కలెక్షన్లు దాదాపు 69.8 శాతం పడిపోవడం గమనార్హం. ఇది సినిమా థియేట్రికల్ రన్‌పై ప్రభావం చూపించే పరిణామంగా మారింది.
రూ.30 నుంచి రూ.40 కోట్ల నష్టాలు?
ఇప్పుడు ఈ సినిమాకు సంబంధించి ఎక్కువగా వినిపిస్తున్న చర్చ థియేట్రికల్ నష్టాల గురించే. భారీ బడ్జెట్‌తో రూపొందిన ఈ చిత్రానికి ప్రేక్షకుల నుంచి ఆశించిన స్థాయిలో స్పందన రాకపోవడంతో డిస్ట్రిబ్యూటర్లకు పెట్టుబడులు వెనక్కి వచ్చే పరిస్థితి కనిపించడం లేదు. ముఖ్యంగా తెలుగు రాష్ట్రాల్లో థియేట్రికల్ బ్రేక్ ఈవెన్ చేరుకోవడం కష్టంగా మారిందనే అభిప్రాయాలు వ్యక్తమవుతున్నాయి. ట్రేడ్ కథనాల ప్రకారం తెలుగు రాష్ట్రాల్లోనే బ్రేక్ ఈవెన్ కోసం సుమారు రూ.44 కోట్ల షేర్ అవసరమని, ప్రస్తుత వసూళ్ల పరిస్థితుల్లో ఆ లక్ష్యాన్ని చేరుకోవడం కష్టమని పంపిణీ వర్గాలు భావిస్తున్నాయి.
ఇక ప్రస్తుతం ఈ సినిమాకు వస్తున్న వసూళ్లు ఇలాగే కొనసాగితే థియేట్రికల్ బిజినెస్‌లో దాదాపు రూ.30 కోట్ల నుంచి రూ.40 కోట్ల వరకు నష్టాలు వచ్చే అవకాశం ఉందనే అంచనాలు వినిపిస్తున్నాయి. అయితే ఇవి తుది లెక్కలు కాకుండా ప్రస్తుత ట్రేడ్ అంచనాలు మాత్రమే. ఓటీటీ, శాటిలైట్, ఇతర నాన్-థియేట్రికల్ హక్కుల ద్వారా కొంత మేరకు నిర్మాతలకు ఊరట లభించే అవకాశం ఉంది.
వెంకీ–త్రివిక్రమ్ కాంబోకు ఎదురుదెబ్బ!
సాధారణంగా వెంకటేష్ సినిమాలకు కుటుంబ ప్రేక్షకుల్లో మంచి ఆదరణ ఉంటుంది. మరోవైపు త్రివిక్రమ్ సినిమాలంటే వినోదం, చమత్కారమైన సంభాషణలు, భావోద్వేగాలకు ప్రత్యేక గుర్తింపు ఉంది. ఇలాంటి క్రేజీ కాంబినేషన్‌లో వచ్చిన ‘ఆదర్శ కుటుంబం’ ఆశించిన విజయాన్ని అందుకోలేకపోవడం అభిమానులను నిరాశపరుస్తోంది. ఒకవేళ ట్రేడ్ వర్గాలు అంచనా వేస్తున్న స్థాయిలో నష్టాలు నమోదైతే ఈ సినిమా వెంకటేష్ కెరీర్‌లోనే కాకుండా త్రివిక్రమ్ కెరీర్‌లోనూ చర్చనీయాంశంగా నిలిచే అవకాశం ఉంది. మొత్తానికి భారీ అంచనాలతో వచ్చిన ఈ కుటుంబ కథా చిత్రం బాక్సాఫీస్ వద్ద మాత్రం భారీ మూల్యం చెల్లించుకునే పరిస్థితి కనిపిస్తోంది.
నటీనటులు
విక్టరీ వెంకటేష్ ప్రధాన పాత్రలో నటించిన ‘ఆదర్శ కుటుంబం – హౌస్ నంబర్ 47’ చిత్రంలో శ్రీనిధి శెట్టి కథానాయికగా నటించారు. నారా రోహిత్, నివేదా పేతురాజ్, దింపుల్ హయాతి, యూవినా పార్తవి, రాజా ప్రజ్వల్, రావు రమేష్, వెన్నెల కిషోర్, సత్య, బ్రహ్మాజీ, రఘుబాబు, ఉడయ్‌బీర్ సంధు, నిఖితిన్ ధీర్, పూజిత పొన్నాడ తదితరులు కీలక పాత్రల్లో నటించారు.
